Ի՞նչ են հայտնաբերել Իջեւանի ոստիկանները փայտամշակման արտադրամասեր ստուգայցեր իրականացնելիս

Օրերս ոստիկանության Տավուշի մարզային վարչության եւ Իջեւանի բաժնի ծառայողները բնապահպանական ոլորտի օրինախախտումներ հայտնաբերելու եւ կանխարգելելու նպատակով իրականացրին ուժեղացված ստուգայցեր։

Վաղ առավոտյան, մինչ միջոցառումը սկսելը, ոստիկանության ծառայողները հրահանգավորվեցին ու անցան գործի։ Ստուգողական այցեր կատարվեցին Իջեւանի բաժնի սպասարկման տարածքի մի շարք գյուղերում գործող փայտամշակման ու փայտածուխի շուրջ տասը արտադրամաս։

Հայտնաբերվեց ընդհանուր մի քանի տասնյակ խորանարդ մետր փայտանյութ, տարբեր չափի տախտակներ, մի քանի տասնյակ պարկ փայտածուխ, փայտածուխի պատրաստման տարաներ, արկղի դետալներ, փայտանյութով բարձված բեռնատար, վառելափայտ, մի քանի տասնյակ խորանարդ մետր թափոն եւ այլն։

Որոշ դեպքերում տնտեսվարողները հայտնաբերվածի օրինականությունը հավաստող որեւէ փաստաթուղթ չեն ներկայացրել։ Դեպքերի առթիվ ոստիկանության Իջեւանի բաժնում նյութեր են նախապատրաստվում։ Նշանակվել են մասնագիտական ստուգումներ։ Նմանօրինակ միջոցառումները շարունակական են լինելու։