Կա 21,000 սարքի պակաս․ ավելորդ համակարգիչդ կամ խելախոսդ տրամադրիր աշակերտներին

0bd72b50-7040-11ea-b6c6-47e4cf4f6a8990612218_533624237529244_922940140643418112_n.jpg

ՀՀ ԿԳՄՆՍ նախարար Արայիկ Հարությունյանը ֆեյսբուքյան իր էջում գրառում է կատարել՝ անդրադառնալով հեռավար կրթության կազմակերպման խնդիրներին։

Նա նշել է, որ կա առնվազն 21,000 սարքի պակաս։

«⁉️ Ավելորդ համակարգիչ կամ խելախոս ունե՞ս

✅Հեռավար կրթության կազմակերպման այս պահի ամենամեծ խնդիրներից մեկը աշակերտների և ուսուցիչների շուրջ 10 տոկոսի շրջանում սարքերի բացակայությունն է: Ներկայիս դրությամբ խոսքն առնվազն 21,000 սարքի պակասի մասին է (համակարգիչներ, պլանշետներ, խելախոսներ` սմարթֆոններ):

✅Ինչպես արդեն հայտարարել եմ, սույն հարցով դիմել ենք և դիմում ենք շատ կազմակերպությունների և անհատների, ու արդեն ունենք արդյունքներ: Նվիրաբերված բոլոր համակարգիչները կամրագրվեն համակարգչի կարիք ունեցող ուսուցչի կամ աշակերտի դպրոցի հաշվեկշռում: Արտակարգ դրության ավարտից հետո դրանք ենթակա կլինեն վերադարձի դպրոցներ և օգտագործման դասապրոցեսում աշակերտների կողմից:

✅Սկսած կիրակի՝ մարտի 29-ից ժամը 10:00-ից մինչև ժամը 18:00-ն (10:00-15:00՝ կազմակերպությունների համար, 15:00-18:00՝ անհատների համար) Երևանի Հանրապետության փողոց 73 հասցեում՝ Խաչիկ Դաշտենցի անվան թիվ 114 ավագ դպրոցի տարածքում կբացվի ընդունման կետ: Ընդունման կետը կգործի նաև հաջորդ օրերին (տեղեկությունների համար գործում է 091-20-29-60 հեռախոսահամարը): Կարևոր է, որ ընդունման կետ գալիս արտակարգ դրության ժամանակահատվածում տեղաշարժման թերթիկի «այցելության նպատակ» բաժնում նշեք «սարքի նվիրաբերում»:

✅Շատ կարևոր է նաև, որ սարքերը համապատասխանեն այս հղմամբ` https://bit.ly/2wGE4V4 նշված նվազագույն չափանիշներին, որպեսզի հասցեատիրոջը փոխանցելուց հետո չհայտնաբերվեն անսարքություններ և անհամապատասխանություններ կիրառվող ծրագրերի հետ: Այդ պատճառով ընդունման կետում էլ մեր մասնագետները կուսումնասիրեն սարքի պարամետրերը:

✅Մենք տեսնում ենք ուսուցիչների ու աշակերտների ոգևորությունը և պետք է աջակցենք կրթական համակարգին՝ այս սահմանափակումները որպես հնարավորություն օգտագործելու և ժամանակակից տեխնոլոգիաները կրթական համակարգ բերելու համար:

🔴 Խնդրում ենք այս տեղեկատվությունը լայնորեն տարածել ձոր էջերում` օգնելու ձեր համադասարանցիներին»,- գրել է նա: